狗狗分離焦慮症——「我不要一個人！」

疫情之後好多人都返返公司做嘢，屋企嘅狗狗習慣咗主人成日喺度，突然間要長時間自己一個，就好容易出現「分離焦慮症」。我哋最近都收到唔少領養人求助，話狗狗喺屋企亂咬嘢、吠到隔籬鄰舍投訴、甚至喺屋企大小便。主人覺得頭痛，但係狗狗其實係好痛苦㗎。

分離焦慮嘅典型行為：
狗狗喺主人準備出門嗰一刻就開始緊張，例如見你拎鎖匙、著鞋，佢就會開始喘氣、來回踱步、流口水、吠叫或者嗚嗚聲。到你出咗門口之後，可能會透過屋企嘅cam見到佢不停咁吠、破壞傢俬或門框（特別係專攻你離開嗰道門）、喺屋企周圍大小便（即使佢已經受過如廁訓練）、甚至有啲會自殘，例如係咁舔自己隻腳舔到損曬。當你返到屋企，佢會超級興奮，興奮到失禁，好似你離開咗好幾年咁。

點樣幫狗狗舒緩分離焦慮？
首先，你要確保狗狗有足夠嘅運動同精神消耗。一隻精力充沛嘅狗，你冇同佢放電就留低佢喺屋企，佢梗係會揾嘢嚟發洩。每日出門前，帶佢出去散步跑到佢攰，返到屋企佢自然會想休息多過想破壞。第二，進行「脱敏訓練」。你可以由好短時間開始練習，例如著鞋、拎鎖匙，但係唔出門，坐返低睇電視，等狗狗唔會將呢啲動作同你離開連繫埋一齊。跟住，你可以試嚇出門口一分鐘，然後返入嚟，慢慢延長到五分鐘、十分鐘。每次返入嚟都唔好大聲同佢打招呼，要保持冷靜，等佢知道你出門同返屋企都係好平常嘅事。第三，提供娛樂俾佢。出門之前，俾一啲可以塞零食嘅玩具佢，例如Kong（一個可以塞食物嘅橡膠玩具），塞滿佢鍾意食嘅嘢，等佢掛住喺度同個玩具搏鬥，分散佢嘅注意力，唔會成日focus喺你離開咗呢件事上面。最後，如果情況嚴重，一定要尋求獸醫或者專業狗隻行為訓練師嘅協助。某啲情況可能需要配合藥物去穩定狗狗嘅情緒。

記住，狗狗唔係故意搞破壞，佢哋只係太愛你，唔識得處理「獨自一個」嘅恐懼。用耐性同愛心去幫佢哋慢慢克服，先係最好嘅方法。