【新聞討論】五幼貓遭密封紙箱棄粉嶺 動物組織狠批「喪心病狂」

《香港文匯網》報導，粉嶺一個屋苑嘅後巷有人將五隻幼貓密封喺紙箱入面棄置。動物組織「貓の地帶動物慈善」接獲求助之後到場救援，經獸醫檢查，五隻幼貓只得兩個月大，全部患上感冒，其中三隻嘅眼睛嚴重感染，好似「白內障」咁，有一隻更加要緊急做手術「開眼」。組織負責人直斥棄貓人「喪心病狂」。

每次睇到呢類新聞，我哋團隊都好心噏。五隻BB貓，封喺一個密封嘅紙箱入面，冇空氣、冇水、冇糧，喺又黑又焗嘅環境下等死。呢個唔單止係遺棄，直頭係謀殺。

我明白有啲人可能屋企嘅貓意外懷孕，生咗貓B唔知點處理，但係用呢種方法棄置絕對唔係辦法。如果有呢類情況，其實可以聯絡任何一間動物救援組織，我哋會盡力幫手接收貓B同貓媽媽，安排暫養同之後嘅領養。就算真係冇位，我哋都可以俾到建議你點樣暫時照顧住佢哋先。

我哋喺度呼籲，如果你見到有人遺棄動物，或者見到可疑嘅紙箱、袋放喺街上面，請你多啲留意。你嘅一個舉手之勞，可能可以救返幾條生命。