【新聞關注】灣仔堅拿道天橋私家車撞斃流浪貓不顧而去

上星期五（27日），灣仔堅拿道天橋發生一宗令人心痛嘅交通意外。一架私家車輾過一隻黃色唐貓之後不顧而去。有途經嘅熱心司機即刻停車，落車瞭解同嘗試救助，但係貓貓已經當場死亡，最後要交由義工跟進。動物組織「阿棍屋」喺社交平台發文講述咗事件。

我哋睇到呢單新聞之後，成隊人都好難過。堅拿道天橋係一條好繁忙嘅行車天橋，車速好快，附近係有唔少流浪貓出沒嘅。呢啲貓可能係由附近嘅後巷、或者由跑馬地嗰邊行過嚟嘅。

件事有幾個層面值得討論。第一，司機撞到動物之後不顧而去，其實係可以構成「遇事不報」㗎。如果撞到狗或者貓，法律上係有責任停車同報警嘅。第二，呢單嘢再次反映咗灣仔區流浪動物嘅處境有幾危險。佢哋每日都要喺車來車往嘅街道上面揾食、揾地方瞓，隨時都會遇到意外。

我哋喺度呼籲各位駕駛人士，如果唔好彩撞到動物，請你停車同報警，或者聯絡附近嘅動物救援組織。你嘅一個電話，可能就係一條生命嘅最後機會。