汕頭街唐樓後巷救起三腳花貓

天氣一凍，啲流浪貓就會揾地方取暖。

有街坊message我哋，話汕頭街一幢唐樓嘅後巷，有隻三色花貓成日伏喺熱水爐排氣口隔籬，但佢行路拐嚇拐嚇，左前腳吊起唔到地。

我同十三妹放工即刻過去。

條巷好窄，堆滿雜物，揾咗一輪先見到隻貓匿喺一堆紙皮入面。

佢係玳瑁色，眼仔好驚，見到我哋想走但跑唔快。

我用罐頭氹佢，佢猶豫咗好耐先伸出頭嚟食。

趁佢食緊，我一手用毛巾包實。

檢查發現佢左前腳係舊傷，已經變形壞死，唔知係畀車轆過定畀嘢夾過。

帶去獸醫度，話要截肢保命，因為傷口已經有感染跡象。

手術後佢好快適應，三條腳跳上跳落仲好活躍。

我哋幫佢改名叫「汕花」，佢把聲好嗲，成日喵喵叫引人摸。

希望有人識欣賞佢嘅堅強，畀佢一個温暖嘅家。