中心首次灣仔街站宣傳日 街坊反應超出預期

上星期六，我哋「愛和流浪動物之家」搞咗第一次街站宣傳活動，位置揀咗喺灣仔修頓球場對出嘅行人路。我哋整咗幾塊展板，貼曬過去一年嘅救助案例相，仲準備咗一堆單張同領養資訊小冊子派俾街坊。

開頭大家都好緊張，驚冇人理我哋，又驚俾人當係推銷。點知反應好到出乎意料！好多街坊行過都停低睇展板，有啲仲主動問我哋點樣可以領養或者做義工。最令我印象深刻嘅係一個大約六十歲嘅伯伯，佢睇完「黑仔」嘅故仔之後，眼濕濕咁問我哋有冇捐款箱，佢話自己屋企唔可以養狗，但係想出一分力。

青青嗰日帶咗暫養緊嘅「春捲」嚟做親善大使，春捲著住件小背心，好乖咁俾人摸，吸引咗好多細路仔圍觀。cici就負責影相，佢影咗好多好靚嘅相，之後放上fb反應都好好。

當日我哋收到超過十份領養查詢同廿幾份義工申請表。雖然唔係全部都會成事，但係呢個反應已經令我哋好鼓舞。我哋決定以後每個月都搞一次街站，希望可以接觸到更多區內街坊，令更多人認識流浪動物嘅處境。