莊莊的等待——由簷篷到梳化嘅幸福貓生

三月份喺莊士敦道舊樓簷篷救下嘅三色花貓「莊莊」，一直暫養喺我屋企。

佢好嗲人，但同時又好細膽，可能係之前受驚過度。

領養資訊出咗好耐，終於有一位獨居嘅周小姐聯絡我哋。

周小姐話佢以前養過貓，隻貓老死咗之後一直好掛住，見到莊莊嘅相就覺得好有緣。

佢上嚟我屋企探莊莊嗰日，莊莊竟然主動行過去蹭佢，連我都嚇一跳。

我同周小姐詳細講解領養程序，佢好快就填好申請表，我仲即場考佢一啲基本嘅貓知識，例如貓唔可以食朱古力、要定期杜蟲等等，佢全部識答。

之後上佢屋企做家訪，見到佢已經準備好曬貓籠、貓沙盤、貓抓板，窗都裝曬防墮網。

我好放心。

領養一個月後我去做回訪，莊莊已經適應曬新屋企，成日瞓喺梳化上面，仲俾周小姐抱住剪指甲。

見到佢由喺簷篷上面震震嚇，到而家成個皇帝咁歎世界，真係好感動。