【政策關注】政府擬修訂《防止殘酷對待動物條例》 放生或遺棄動物將屬違法

今日睇到一個好重要嘅新聞，環境及生態局局長謝展寰喺立法會會議上透露，局方計劃修訂《防止殘酷對待動物條例》，明確規定放走或遺棄動物因而對該動物造成不必要痛苦，即屬犯罪，仲建議提高針對殘酷對待動物行為嘅罰則，以提高阻嚇力，預料年底或明年初將相關法例修訂建議提交立法會審議。

謝展寰仲話，考慮到放生動物涉及宗教同傳統文化，若立法禁止放生會有較大反彈，亦不合適。但當局計劃修例，明確指出放走或遺棄動物屬於違法。

我哋團隊對呢個消息係非常歡迎嘅。老實講，我哋做救援咁耐，見過太多因為被遺棄而受苦嘅動物。有好多人以為將動物「放生」係做善事，但其實絕大部分嘅「放生」都等於「放死」——佢哋根本冇喺野外生存嘅能力，最後唔係餓死、病就係俾車撞死。如果法律可以明確將遺棄動物列為違法，而且有足夠嘅罰則，相信可以減少呢類悲劇嘅發生。

不過，立法只係第一步，最重要嘅係執法同公眾教育。我哋希望政府喺修例嘅同時，都可以加強對公眾嘅宣傳教育，令市民明白飼養寵物係一生一世嘅責任。