「春捲」嘅街市第二人生

舊年十二月喺太原街救返嚟嗰隻「春捲」，估唔到最後係畀街市一個賣菜嘅蓮姐領養。

蓮姐成日見到佢喺街市流浪嗰陣已經好鍾意佢，知道佢俾我哋救咗之後，成日都會嚟中心探佢。

佢初頭都唔敢話想領養，覺得自己只係個街市賣菜婆，怕我哋覺得佢養唔起。

我同佢傾咗好多次，話佢知，我哋睇嘅唔係人有冇錢，而係有冇心。

蓮姐終於肯填申請表，佢寫字好慢，但係每一題都好認真寫，連屋企有幾多個窗都畫埋出嚟。

我哋去佢屋企做家訪，雖然地方細，但係好乾淨，窗都裝咗網。

我同佢講解咗好多養貓要注意嘅嘢，例如唔好畀貓食人食嘅嘢、要定期帶佢打針。

蓮姐聽得好專心，仲叫我寫低畀佢。

領養嗰日，「春捲」一入屋就揾咗個紙箱捐入去，好快就適應咗。

蓮姐而家成日send相畀我，「春捲」肥到呢，成日攤喺菜檔隔離嘅紙皮上面曬太陽，街坊個個都認得佢，仲封咗佢做「春捲街花」。