【政策追蹤】立法會首讀禁餵野鴿草案 罰款最高十萬元監禁一年

立法會今日首讀同二讀《2023年野生動物保護（修訂）條例草案》，重點係將禁止餵飼野鴿嘅規定擴大至全港。環境及生態局局長謝展寰指出，當局每年收到約1,700宗相關投訴，野鴿聚集造成環境衞生問題，影響居民生活。

草案建議將非法餵飼動物嘅最高罰則，由現時罰款一萬元提高至十萬元，另加最高一年嘅監禁刑罰；仲會引入定額罰款制度，每張罰單嘅罰款額為5,000元。執法人員嘅人選類別亦會擴大，增加食環署、康文署同房屋署嘅獲委任人員。

我哋團隊討論過呢個修例。龍龍話，禁餵野鴿嘅出發點係好嘅，因為過度餵飼真係會令鴿羣數量失控，造成環境衞生問題。但係阿燕擔心，單純禁餵而冇配套措施，啲鴿可能會因為食物減少而更加虛弱，衍生其他動物福利問題。

我哋認為，最理想嘅做法係「禁餵」同「源頭管理」並行。例如可以參考外國嘅做法，喺適當嘅地點設置人工鴿舍，用避孕飼料控制鴿羣數量，同時加強公眾教育，等市民明白點解唔應該隨便餵飼野生動物。