貓貓舔毛舔到肚仔光禿禿？小心係壓力警號！

我屋企暫養嗰隻貓「肥機」，前排唔知搞乜鬼，成日係咁舔個肚，舔到肚仔啲毛甩曬，光禿禿咁。開頭以為佢有皮膚病，帶去睇獸醫，點知醫生檢查完一輪，話佢皮膚好正常，懷疑係「心理性脱毛」——即係壓力大呀！

原來貓同人一樣，有壓力就會有啲奇怪行為，過度舔毛就係其中一種。佢哋不斷舔同一個位，舔到毛都甩埋，有啲甚至會舔到皮膚紅曬損曬。貓咪壓力嘅來源可以好多，例如：

環境改變——你搬咗屋、換咗新梳化、或者屋企多咗個新成員（無論係BB定係新寵物），貓都會覺得唔習慣。貓係好慣性嘅動物，乜都要保持不變先有安全感。

無聊同悶——貓日日喺屋企冇嘢做，你又長時間唔喺屋企，佢哋就會用舔毛嚟打發時間。舔毛對佢哋嚟講係一種自我安慰嘅行為，但係舔過龍就變咗病態。

噪音驚嚇——成日有人裝修、出面有工程、或者你屋企附近成日有嘈音，都會令貓長期處於緊張狀態。

咁點樣幫佢哋減壓呢？首先，你要提供一個安全嘅「避難所」俾佢，例如一個有蓋嘅貓窩，或者紙皮箱，等佢驚嗰陣有地方匿。第二，陪佢玩多啲，每日起碼陪佢玩十五至二十分鐘，消耗嚇佢嘅精力，等佢冇咁無聊。第三，可以買啲益智玩具或者藏食玩具，等你出咗街嘅時候，佢都有嘢可以玩，唔使淨係對住四幅牆。最後，如果情況持續冇改善，就一定要帶佢睇獸醫，排除咗身體疾病先，再同醫生商量點樣處理心理問題。

「肥機」而家經過我成日同佢玩同按摩，已經好返好多，肚仔啲毛都生返曬出嚟喇！各位貓奴，見到主子成日舔同一個位，真係要留意嚇呀！