狗狗散步扯繩點算好？正向訓練三步曲

成日都有領養人同我講：「十三妹，我隻狗一齣街就扯繩，扯到我膊頭都就嚟甩，點算呀？」狗狗扯繩散步，唔單止令主人好辛苦，對狗狗嚟講都唔係一個良好嘅散步體驗。今日我就分享嚇用「正向訓練」改善扯繩問題嘅三個步驟。

第一步：準備合適嘅工具。
唔好用choke chain（又稱P鏈，勒頸時會收緊的鏈帶）或者有尖刺嘅頸圈！呢啲工具會整痛狗狗，令佢哋對散步產生恐懼，而且長遠嚟講並唔會教識佢哋正確嘅散步方式。建議使用胸背帶（H-harness），可以均勻分散壓力，唔會勒住佢哋條氣管。牽繩方面，揀一條長度固定（約1.5米至2米）嘅就好，千祈唔好用伸縮牽繩，因為伸縮繩會令狗狗學唔識咩叫「合適嘅距離」。

第二步：室內練習「跟住行」。
喺一個冇乜幹擾嘅環境，例如你屋企個廳度，開始練習。企喺狗狗旁邊，用零食引佢喺你腳邊位置，當佢喺你腳邊行嘅時候，就讚佢「好乖！」同俾零食佢食。重複呢個練習，等佢知道，留喺你腳邊係有獎勵嘅好事。慢慢你就會發現，佢會自自然然咁望住你跟住你行，因為佢想得到你嘅獎勵。

第三步：室外實戰，逐步進階。
當狗狗喺室內做到「跟住行」之後，就可以移師到室外練習，但要揀一個好少好少幹擾嘅地方開始，例如一條靜嘅後巷。同室內練習一樣，一見佢喺你腳邊行就獎。記住，當狗狗開始扯繩，千祈唔好同佢鬥力！你只需要即刻停低，變成「人肉電燈柱」，唔好拉返佢轉頭，只係企定定喺度。當狗狗發覺扯繩冇用，反而會失去向前嘅機會，佢會自然咁回頭望你，或者放鬆條繩。呢個時候，你要即刻大聲讚佢同俾零食佢食。呢個方法係話俾佢知：「扯繩係冇用㗎，留喺我身邊先係最好㗎！」

正向訓練需要耐性同時間，唔好期望一步登天。但係只要你堅持用愛心同零食，你好快就會有一隻識得乖乖行喺你腳邊嘅狗狗㗎喇！