交加街排檔底救獲中暑唐貓

嗰排連續幾日三十幾度，熱到人都頂唔順，何況啲流浪動物。

有排檔檔主打嚟，話交加街有隻灰白色唐貓匿喺排檔底，攤喺度唔鬱，個口係咁喘氣。

我同博仔即刻跑去。

見到隻貓嗰陣，佢已經半昏迷，成身軟曬，口吐白沫。

我即刻用凍水整濕毛巾包住佢，博仔去附近便利店買凍水同冰，我哋一邊幫佢降温一邊跑去診所。

途中佢失禁，我心都涼咗一截。

好彩去到診所，獸醫即刻同佢吊鹽水同用酒精降温，話佢體温去到四十一度，再遲少少就救唔返。

佢留醫咗成個禮拜，我哋日日去探佢，佢由完全冇反應到開始識望住我哋喵喵叫。

而家佢改名叫「交暑」，康復得好好，仲係有啲驚人，但好鍾意食嘢。

佢嘅故事提我哋，夏天一定要為流浪動物提供乾淨嘅水源。