中心獲善心人捐贈物資 小動物過冬有保障

入冬喇，天氣開始轉涼，我哋中心嘅暫養動物都需要做好保暖措施。上星期我哋喺fb度出咗個post，呼籲大家捐贈一啲冇用嘅毛毯、毛巾、暖水袋之類嘅保暖物資。點知反應好熱烈！

一個星期之內，我哋收到超過五十張毛毯、三十個暖水袋、仲有好多包寵物用嘅暖包。有一位住灣仔嘅婆婆，特登拎咗幾張佢親手車嘅貓狗牀過嚟，話佢以前都係做車衣嘅，而家退休咗，好開心可以為動物出一分力。婆婆嘅手工好好，啲牀仔軟腍腍，啲貓一瞓上去就唔肯走。

最令我感動嘅係，有一個大約七八歲嘅小妹妹，用自己嘅零用錢買咗一大袋狗糧，同爸爸一齊拎嚟中心。佢話佢喺學校嘅活動度聽過我哋嘅分享，好想幫手。小妹妹仲喺袋狗糧上面貼咗張手寫嘅卡，寫住「希望狗狗唔好凍親」。

而家中心嘅暫養區全部都鋪咗毛毯，每個籠都有暖水袋，動物嘅冬天應該唔會太難過。多謝各位善心人嘅支持，你哋嘅心意，我哋同啲動物都收到曬㗎喇！