【政策前線】動保界促加快推動謹慎責任制 將貓隻納入繁殖規管

《星島日報》今日報導，有動保界人士建議，將現時規管狗隻售賣及繁殖嘅法例擴展至貓隻，或者加快推動「謹慎責任制」嘅立法。「毛守救援」創辦人陸家捷指出，《公眾衞生（動物及禽鳥）（售賣及繁育）規例》目前只係規管狗隻嘅售賣同繁殖，要求住家繁殖場領牌、登記狗隻資料、為狗隻提供足夠活動範圍等，但貓隻並未納入規管。

呢個議題其實困擾咗動物救援界好耐。貓嘅繁殖場同走私問題一啲都唔比狗少，但係因為法例冇規管，所以好難執法。我哋中心成日都收到因為繁殖場棄養而流落街頭嘅名種貓，佢哋好多都有遺傳病或者長期健康問題。

另外，「謹慎責任制」呢個概念都好值得討論。簡單嚟講，即係法律唔單止禁止人虐待動物，仲要主動要求動物負責人採取合理措施，確保滿足動物嘅福利需要，包括適當嘅營養飲食、合適嘅居住環境、保護免受痛楚同疾病等。

我哋團隊認為，無論係將貓納入繁殖規管，定係推動謹慎責任制，都係香港動物福利嘅重要一步。希望政府可以聽到動保界嘅聲音，加快立法步伐。