中心TNR計劃一週年回顧——百二隻街貓完成絕育

眨嚇眼，我哋嘅擴大TNR（捕捉、絕育、放回）計劃已經推行咗一年。今日我哋整理數據嘅時候，發現成績比預期中好！過去十二個月，我哋一共幫咗一百二十幾隻灣仔區嘅街貓完成絕育手術。

最高紀錄係今年四月，一個月內做咗十五隻。嗰個月博仔同龍龍幾乎隔日就去捕貓，捉完就飛車送去診所，做完手術又要接返嚟觀察，等傷口好返先放回原地。博仔話佢嗰個月瘦咗五磅，但係值得嘅。

最難忘嘅一次係喺交加街後巷捉一隻好醒目嘅黑貓，我哋用咗三個星期、換咗四款唔同嘅捕貓籠、試過五種唔同嘅餌，先終於捉到佢。捉到嗰刻，我同阿燕開心到大叫，啲街坊以為我哋中咗六合彩。

TNR雖然辛苦，但係效果真係好明顯。以前春園街一帶成日見到一竇竇貓B，而家明顯少咗好多。有啲街坊仲主動同我哋報料，話邊度有新嘅貓羣出現。最開心嘅係，有啲做完絕育嘅貓放返去之後，俾附近嘅舖頭「收編」咗做舖頭貓，有瓦遮頭又有穩定嘅食糧，比起流浪好好多。

我哋嚟緊會繼續推呢個計劃，目標係下年可以做到一百五十隻。