【新聞轉載】14歲牧羊犬炎暑下遭遺棄街頭 主人終「上水」道歉

前排睇到《晴報》嘅報導，真係睇到我火都嚟埋。話説有個主人喺炎熱天氣下，將一隻十四歲嘅老牧羊犬遺棄喺荃灣街頭。隻狗被人發現嗰陣好虛弱，趴喺地下喘曬大氣，要由「毛守救援」送去醫院。

事件曝光之後，主人受到網民猛烈抨擊，終於「上水」解釋，話因為屋企有人患病，冇辦法繼續照顧云云。但係呢個理由真係講得通咩？十四歲嘅老狗，陪咗你十幾年，到佢老咗、最需要你嘅時候，你就咁抌佢出街？仲要揀喺大熱天時？如果冇人發現，隻狗可能就咁死喺街頭。

我哋中心都有收過類似嘅case。有啲人棄養嘅理由層出不窮：老婆懷孕、搬屋、狗狗有病唔想醫、甚至係「唔得意喇」。每次聽到呢啲理由，我哋都好心痛。

我喺度想呼籲大家，養寵物之前真係要諗清諗楚。佢哋會老、會病、會需要你照顧十幾年。如果你冇呢個心理準備，請你唔好養。動物唔係玩具，佢哋係有血有肉、有感情嘅生命。