【新聞討論】公屋居屋嚴禁養狗 寵物友善住屋問題何時解決？

最近有一篇報導引起咗我哋團隊好大嘅關注。根據現行政策，公屋同居屋未經書面同意係嚴禁飼養動物嘅，只有導盲犬、引路犬同獲醫生推薦作精神支柱嘅伴侶犬先可以申請豁免。貓隻方面，房委會規定必須要絕育。截至2024年12月底，合資格嘅伴侶犬申請數量其實好少。

呢個政策對好多住公屋嘅愛寵物人士嚟講係一個好大嘅困擾。有啲人本身養開狗，但係因為搬入公屋而要被迫放棄寵物，變相製造咗更多被遺棄嘅動物。

我哋討論嘅時候，阿燕話佢識得有幾個住公屋嘅朋友，其實好想領養貓狗，但係因為屋邨規定唔俾養，唯有放棄。博仔就話，外國有好多例子係公屋都可以養寵物嘅，關鍵在於管理而唔係一刀切禁止。例如可以要求寵物必須植入晶片同絕育、限制體型、要求主人簽署責任協議書等。

我覺得呢個議題好值得社會討論。香港嘅居住空間愈來愈細，公屋居民佔咗好大嘅比例，如果佢哋全部都被禁止養寵物，咁樣領養嘅潛在家庭就會少咗一大截。我哋希望政府可以檢討相關政策，喺動物福利同屋邨管理之間揾到一個平衡點。