新手養貓必讀——帶貓B返屋企前要做嘅準備

好多人見到貓B得意就好想即刻帶返屋企，但係養貓之前真係要做好準備㗎！我同大家分享嚇我嘅經驗啦。

首先，你要預備好基本用品。貓沙盤、貓沙、貓糧、水兜同糧兜係基本嘢。貓沙盤最好放喺通風同安靜嘅角落，千祈唔好放喺貓糧隔籬，因為貓好愛乾淨，唔會鍾意喺食飯嘅地方附近上廁所㗎。貓糧方面，如果係貓B，要買幼貓配方，營養高啲，佢哋先會快高長大。

其次，家居安全好緊要！貓係好奇寶寶，乜都會玩一餐。你要收好曬啲電線，最好用電線保護套包實佢，唔係佢哋會當係玩具咁咬，分分鐘觸電㗎。仲有窗一定要裝窗網！我哋中心見唔少貓都係冇窗網跳落街受傷，甚至死亡，千祈唔好諗住貓識平衡就唔會跌，佢哋追雀仔或者昆蟲嗰陣會乜都唔理就跳出去㗎。

第三，準備一個安全區。貓B啱啱到新環境會好驚，你最好準備一個細房仔或者角落俾佢，放好貓沙盤、糧、水同一個舒服嘅貓牀，等佢慢慢適應。唔好一返嚟就係咁抱佢摸佢，俾啲時間佢自己探索。你坐喺地下，等佢主動行過嚟揾你先係最好嘅方法。

最後，記得帶佢去獸醫度做身體檢查、杜蟲同打防疫針。養貓係一生一世嘅承諾，佢哋可以陪你十幾二十年㗎，諗清楚先好帶佢返屋企呀！