【政策分析】香港非法捕獸器同走私貓問題上升 半年拯救351隻動物

根據英文媒體報導，香港近期嘅非法捕獸器同走私貓問題有明顯上升趨勢。喺過去六個月，一個動物救援組織報告話一共拯救咗351隻動物，平均每日救兩隻。數字仲顯示，獲救嘅貓入面有43.2%係受傷或者有病嘅，狗嘅比例更加高達64.2%。

呢個數字好驚人。平均每日救兩隻動物，即係話香港每日都有動物因為人類嘅行為而受到傷害。非法捕獸器係一個好嚴重嘅問題，特別係喺新界同郊野公園邊緣嘅地區。之前我哋中心都喺聯發街後山救過被捕獸器夾斷腳嘅貓「藍藍」同被鋼索勒頸嘅狗「聯發」，每次諗起都覺得好嬲。

我哋認為，政府應該加強打擊非法捕獸器嘅執法力度，同時都要加強公眾教育。好多放捕獸器嘅人可能唔知道，呢啲裝置唔單止會傷害動物，對行山人士同小朋友都構成危險。我哋亦都呼籲市民，如果喺郊外見到可疑嘅裝置，請即刻報警或者通知漁護署。