柯布連道天橋底發現瑟縮小狗

有街坊朝早返工經過柯布連道近灣仔道嘅天橋底，見到有隻細狗仔匿喺橋墩石屎罅隙入面，凍到震曬。

我同龍龍收到call即刻過去。

現場見到隻狗係淺啡色唐狗，大約五個月大，好細膽，驚到縮埋一舊，身上有少少皮膚病，耳仔有牛蜱。

我哋用零食慢慢引佢出嚟，佢猶豫好耐先肯伸個頭出嚟聞嚇，但一有車聲即刻縮返入去。

如是者僵持咗成個鐘，最後係龍龍一手伸入去捉實佢後頸先拉到出嚟。

佢驚到瀨尿，但完全冇咬人，只係不停震。

帶去診所檢查，話有營養不良同寄生蟲，要食藥同搽藥。

我哋改佢名叫「柯橋」，因為喺橋底發現。

而家佢喺暫養中心好活潑，成日追住其他狗玩，同初初見到嗰個樣完全唔同。

佢只係需要一個機會同一啲耐性。